中醫調理不可少

想生BB的準媽媽，一定會做好功課，搵中醫師調理好身體，我也不例外

尤其是我之前4次IUI 及1次IVF都失敗

我停了9個月，比自己休息下，周圍去旅行去玩

唔想令到自己太崩緊，日日胡思亂想 (去到快痴線的地步@#Z#)

今年2月我的公家症終於排到了，估唔到咁就等左3年 (公家症內容下一篇再詳談)

既然公家症的期都到了，我都係時候調理好自己的身體喇﹗

之前試左咁多個醫師，呢位醫師最有耐性，有問必答，
她實在似一位媽媽多過一位中醫師，但係她比較崇尚自然療法的，
她的藥單永遠只會有7-8味藥，唔會太複雜

又會教你回家煲養生湯水，唔會叫你食貴藥材!

預到排卵期又會建議你做針炙(一次約$240)，我好鐘意呢度，煲藥速度又夠快，好多時做完針炙就有藥拎，唔會等好耐，呢度既梳化位又舒服又有WIFI (好似講到去嘆世界咁~嘻嘻)

重點係價錢，1日藥$70(連煲藥)，醫生費$120，如果有滙豐信用咭仲有95折優惠
大醫院裡的中醫部，乾淨企理，咁既價錢好合埋!!

我自己覺得，中醫調理身體可以係好漫長的事，所以除了時間，錢都要量入而出，現在每月大約1千蚊，等如買支靚少少的精華素咁上下，皮膚要補，身體就更加要補

不論係咪想生B，女人都應該對自己好啲、愛自己多啲﹗

 最後送上醫師給我的養生三豆烏梅湯 (可以一星期飲兩三次，月經期間暫停)

食譜及做法超簡單，適合男女老幼及特別性急的女性
 大家一齊加油~

PS: 這個一定要熱飲的，所以煲好後最後放入保溫杯，隔一陣又飲幾啖，好似飲熱茶咁。 

自我調理-健康人生

寫呢個題，可能好多人會以為我參加了健康食品的傳銷員，或是想介紹什麼減肥方法，大家放心，我完全無時間去做呢啲大生意，我只係一個想生仔的C9，呢個目標從未想過放棄，當然今次IVF失敗，令我更明白，基礎未打隱，如何起高樓呢個道理，醫生跟我分析，我D卵的質素麻麻地，打左針雖然都谷到21粒，但大部份都係空心，成不到肧胎，所以根本自身都有問題，可能營養不夠，其實不夠原因可能係我食無定時，所以今日突然諗番起之前中醫師講過，身體的五藏六腑係需要講求平衡和諧，我係屬於性急型，成日諗到乜野就要衝去做，而且好易忟憎，所以醫師話條氣好易打亂，提我要多啲深呼吸，唔好成日咁緊張，呢位中醫師曾經係一位護士，所以對人工受孕都好認識，但她是不贊成我去做IVF的，她始終覺得對身體的傷害比較大。

但我自己覺得，其實IVF真係幫到我，只要有恆心調理番好個身體，我相信係會成功既！所以今次我要利用呢個平台，好好督促自己，養番好個身子。

1）飲食均衡 2）作息定時 3）適量運動 4）少憂慮 5）多想正面的事

日日記錄5個重要的事項

睡眠時間：一定要早睡（目標是晚上11點前）
運動時間：每星期3次，每次30分鐘（要輕微出汗，有心跳加快為合適）
忌吃食物：生冷食物及飲品，煎炸野 （如有食過就要記錄）
唔開心的事：如果有發生唔開心的事，要寫出黎，然後同自己講，take it easy!!!

由今天開始要向自己的身體負責任！！！